We care your success

موضوعات

ازاي تبقي مدير ناجح

سهل جدا انك تبقى المدير المتسلط اللي بيفرض اوامره و بيعوز كل حاجة تمشي على طريقته بدون اي مناقشات او اقتراحات. وبالرغم من ان في موظفين كتير بيحبوا يتلقوا الاوامر وينفذوا اللي مطلوب منهم بدون تفكير، الا انه، انت كمدير، في ايدك انك تقوم بشركتك و تشجع فريقك على النجاح و زيادة الانتاج

وعشان تبقي مدير وقائد مسئول حاجة مش سهلة لازم تدريب كويس .. اقرأ المقالة دي وهتسهّل عليك كتير !

اتدرب واتعلم

بالظبط كده اتدرب واتعلم ! اقرأ كويس عن الإدارة وخد كورسات واتدرب .. يعنى بعد ماكبرت وبقيت مدير اخد كورسات ايوة لازم تاخد كورسات علشان تبقى مدير وقائد ناجح لازم تتعلم وتكتسب معلومة من اى موقف ومن اى شخص بتتعامل معاه خليك شغوف بعملك بدرجة 100% متستناش لو لحظة تفوتك حاجة ومتضيعش وقت

اختار فريق عمل صح

المدير الناجح هو اللي بيسعى ان يكون معاه فريق قوي يشتغل معاه. و بيهتم انه يدرس كل المتقدمين للوظيفة، و يختار لها اكتر شخص مؤهل. و برضو بيعرف نقاط قوتهم و ضعفهم، من خلال سيرتهم الذاتية، و جوابات التقديم، و المقابلات، عشان بعد كده يعرف ازاي يساعدهم يؤدوا وظيفتهم باحسن طريقة ممكنة. فهمك لفريقك بيساعدك انك تتواصل معاهم و تحسسهم انهم مميزين وانك بتهتم بهم. ده بيخلق اخلاص وولاء ليك كمدير، و للشغل، و للشركة، و عشان كده الموظفين بيؤدوا شغلهم بإتقان و حب اكتر.

حفز موظفينك وحسسهم بالمسئولية !

ممكن تجمعهم في مكتبك وتعزمهم حتي ولو علي كوباية شاي , حسسهم بالأهتمام واسألهم علي الشغل و ايه المشاكل اللي بتقابلهم فيه ؟ .. دة هيحفزهم ويحسسهم بالمسئولية ويشجعهم علي اداء شغلهم .. ولو حد فيهم قال فكرة حلوة او حقق إنجاز “اوعي” تنسبه لنفسك, وقول ان فلان عمل كذا وشجعه .

مفيش خيار وفاقوس والعدل اساس الملك
حاول تخلي تعاملك مع كل الموظفين واحد ومتحسسش ان في موظف اقل من غيره صحيح انك لما تزود الشغل و المهام على الموظفين، من غير وقت للراحة، هتخلي الشغل يخلص بسرعة. لكن غالبا الشغل هيكون من غير جودة او اتقان، واكيد موظفينك مش هيقدروا يشتغلوا صح لفترة طويلة. و عشان تتجنب حصول ده، لازم تكون عادل. يعني تدي وقت راحة و ممكن اجازات للموظفين اللي بيؤدوا شغلهم كويس، و اشكركم دايما على الانجاز اللي حققوه. ساعتها الموظفين هيحسوا بالتقدير و الاحترام و هيفضوا مخلصين للشركة. من ناحية تانية، لازم تفتكر انك مدير مش صديق، يعني لازم تحاسب الموظفين على أخطائهم. الموظفين كلهم بيحترموا و بيقدروا المدير العادل، حتى لو اتعاقبوا عارفين ان ده حصل لان شغلهم مكنش مطابق لمعايير و قواعد الشغل.

تواصل مع فريقك، و شاركهم في النقاشات و الحوارات.
المدير الناجح بيشرك موظفيه في المشاكل اللي بتتعرضلها الشركة و بيشملهم في عملية ايجاد الحلول. و كمان بيخليهم يحسوا انهم جزء من الشغل و انهم بينتموا للشركة، و عشان كده رأيهم مهم و افكارهم مطلوبة. ومن ناحية تانية، المدير الناجح بيعرف فريقه على رؤية الشركة و اهدافها، و بيشركهم في التخطيط للمشاريع و تطوير الشغل. ومن خلال كل ده، كل موظف بيتاكد انه عمود اساسي في نجاح الشركة، و ان مجهوده سبب في استمرار الشغل.

أعرف انت رايح فين

خطط لاهدافك؛ هدفك ايه في الشغل وهتحقق ايه السنة دي او الجاية او كمان 10 سنين ! شكل الشركة وطبيعتها هيبقي عامل ازاي , شارك دة مع موظفينك وحسسهم بأهمية انهم جزء من الهدف دة !

في النهاية،

دايما خالي في بالك انك عندك القدرة انك تقود فريقك و شغلك و شركتك للنجاح و الازدهار، لو عرفت ازاي تبقى قائد ناجح و ذكي، و توري فريقك ازاي يشتغلوا صح، وازاي يتقبلوا الفشل و يتعلموا منه، وازاي ميستسلموش و يشتغلوا جامد و يفكروا صح في انهم يطوروا من نفسهم و يحققوا اهدافهم.

شاركنا تجربتك كمدير وايه المشاكل اللى قابلتك

القصة :
حكاية موظف كان مديره دايما بينتقده لدرجة ان الموظف اقتنع ان قدراته العقلية ضعيفه وأنه مهما يعمل مش هيقدر يرضي مديره وبعد فتره المدير خرج علي المعاش وجه مدير جديد وطبعا التغيير ده مافرقش مع الموظف لانه وصل لحالة روتينيه في شغله ومابيفكرش يغيرها لانه مقتنع ان ده افضل ما عنده المدير الجديد لاحظ روتينية شغل الموظف ، فبدأ يقرب واداله شغل جديد وقاله انا من كتر ماعاجبني شغلك حسيت ان محدش هيقدر يعمل الشغل ده غيرك اتفاجيء الموظف وقرر انه يعمل الشغل ده بأفضل ما عنده عشان يثبت رأي المدير فيه وفعلا عمل الشغل والمدير كافئه وشكر فيه ادام كل الموظفين وطلب منه انه يعمل خطة تطوير لشغله المعتاد وينفذها وبقي الموظف كل يوم يطور من شغله والمدير ينتقده بطريقه حلوه أو يكافئه لغاية لما الموظف ده رجعتله ثقته في نفسه وقال ليه معملش شركه خاصه بيا وفعلا عملها ونجحت وكان دايما بيعامل موظفينه بنفس طريقة مديره ، وبكده كانوا موظفينوا دينامو في العمل

صفات المدير الناجح

  • احترام وتقدير الموظفين
    خلق الثقة بينه وبين الموظفين
    القدرة علي الكلام مع الموظفين وسماعهم وحل مشاكلهم .
    القدرة علي تقديم الدعم للموظفين
    توفير الموارد اللازمة والتوجيهات الضرورية لنجاح العمل
    تنمية الشعور لدي الموظفين بامتلاك العمل والنجاح معاً.